२०११ च्या भारतीय जनगणनेनुसार उधवा या गावात सुमारे ६०० कुटुंबे राहतात. एकूण लोकसंख्या ३०२९ असून त्यापैकी १५१७ पुरुष व १५१२ महिला आहेत. हे गाव तलासरी तालुक्यात, महाराष्ट्र राज्यात स्थित आहे.

गावात प्रामुख्याने आदिवासी (वारली) व कुणबी समाजातील लोक राहतात. कुणबी समाजाचा मुख्य व्यवसाय शेती असून भातशेती मोठ्या प्रमाणावर केली जाते. आदिवासी समाजातील लोक शेतमजूर, वीटभट्टी मजूर तसेच इतर मजुरीची कामे करतात. काही कुटुंबे कुक्कुटपालन व बकरीपालन करून आपला उदरनिर्वाह करतात.

श्रावण महिन्यात, गणपती उत्सवाच्या पूर्वीच्या काळात, ढगांचा गडगडाट आणि विजांच्या कडकडाटासह कोसळणाऱ्या पावसाच्या सरींमध्ये रानात एक नैसर्गिक भाजी उगवते, तिला ‘अळंबी’ असे म्हणतात. ही भाजी अत्यंत चविष्ट व पौष्टिक असते. मात्र ती उगवल्यानंतर लगेचच काढावी लागते, अन्यथा ती फुलून खाण्यास अयोग्य होते.

पहाटे लवकर उठून अळंबी शोधून फुलण्यापूर्वीच खुडून स्वच्छ करून ती बाजारात विक्रीसाठी नेली जाते. पावसाळ्यात आदिवासी बांधवांना अळंबी संकलनामुळे अल्पकालीन रोजगार उपलब्ध होतो.